ပြည်သူနဲ့အတူလှူကြမယ်အစီအစဉ်က ဝယ်ထားတဲ့ ကိုဗစ်ရောဂါသက်သာစေမယ့် ဆေးတွေ ဒီနေ့ရောက်မှာဖြစ်ကြောင်း ဝမ်းသာစွာမျှဝေလာတဲ့ ဂျွန်လွင်

မြန်မာနိုင်ငံမှာ ကိုဗစ်ကာလစတင်ကတည်းက ကပ်ဆိုးကြီးကို မြန်မာတစ်နိုင်ငံလုံး အဆင်ပြေပြေကျော်လွှားသွားနိုင်ဖို့ အစိုးရထောက်ပံ့ကူညီမှုတွေသာမက ပရဟိတအဖွဲ့အစည်းတွေလည်း များစွာထွက်ပေါ်လာခဲ့ပြီး ယနေ့အချိန်ထိ အင်တိုက်အားတိုက်ကူညီနေတာတော့ ပြည်သူလူထုတစ်ရပ်လုံးလည်း သိကြမှာပါနော်။

ပြည်သူချစ်အနုပညာရှင်တွေလည်း ကိုဗစ်ကာလကို တတ်နိုင်သမျှ ကိုယ်တိုင်လှူဒါန်းနေကြသလို ပြည်သူနဲ့အတူတူလှူကြမယ်အဖွဲ့ကနေတဆင့် လိုအပ်နေတဲ့ ဆေးရုံသုံးစက်တွေ၊ လိုအပ်နေတဲ့အကူအညီတွေ များစွာပေးနိုင်ခဲ့ပါတယ်။

ဒီတစ်ခေါက်မှာလည်း ပြည်သူနဲ့အတူတူလှူကြမယ်အစီအစဉ်မှာ အင်တိုက်အားတိုက်ပါဝင်နေတဲ့ ဂျွန်လွင်ကတော့ သတင်းကောင်းလေးတစ်ခုကို မျှဝေပေးလာပြန်ပါတယ်။ ကိုဗစ်ရောဂါကုသရေးအတွက် အသုံးပြုခွင့်ပေးထားတဲ့ တစ်လုံးကို (၂၄) ဒေါ်လာတန်ကြေးရှိတဲ့ Remdesivir ဆေး အလုံး(၇၉၀) ကို ပြည်သူနဲ့အတူလှူဒါန်းကြမယ်အလှူလက်ကျန်ငွေ (၂၅၄) သိန်းနဲ့ ဝယ်ယူခဲ့ပြီး ဒီနေ့နိုဝင်ဘာ(၂၅) ရက်နေ့မှာ ရောက်လာတော့မှာဖြစ်ကြောင်း သတင်းကောင်းလေးကို မျှဝေပေးခဲ့တာပါ။

ဒီဆေးကတော့ ကိုဗစ်ရောဂါကို အရှင်းပျောက်အောင် မကုသပေးနိုင်သေးပေမယ့် ဗိုင်းရပ်စ်တွေကို သတ်ပေးတဲ့အပြင် ကုသရမယ့်ရက်ကိုလည်း လျှော့ချပေးနိုင်တာမို့ FDA ကခွင့်ပြုထားတဲ့ တစ်ကမ္ဘာလုံးက သုံးစွဲနေကြတဲ့ဆေးဖြစ်သလို မကြာသေးခင်ကလည်း အိန္ဒိယနိုင်ငံက မြန်မာနိုင်ငံအတွက် Remdesivir ဆေးတွေကို လှူဒါန်းပေးခဲ့ပါတယ်။ ဂျွန်လွင်ကတော့ ပါဝင်လှူဒါန်းပေးတဲ့သူတွေအကုန်လုံးကို ကျေးဇူးတင်စကားဆိုခဲ့တဲ့အပြင် ရောက်ရှိလာတဲ့ဆေးတွေကိုလည်း လိုအပ်တဲ့နေရာတွေကိုလှူဒါန်းပေးသွားမှာဖြစ်ကြောင်း ရေးသားမျှဝေခဲ့ပါတယ်။

Be the first to comment

Leave a Reply

Your email address will not be published.


*