မြန်မာအင်ဂျင်နီယာများနှင့် ဒီဖက်ခေတ် လမ်းတံတားတွေ ပိုမိုကောင်းမွန်လာခြင်း နောက်ကွယ်

မြန်မာအင်ဂျင်နီယာတွေဟာ တကယ်တော့ လူညံ့တွေ မဟုတ်ကြပါဘူး..

“စနစ်ပျက်သွားတဲ့မြေ”

ရုံးပင်တံတားအကြောင်းရေးမိတော့ တဆက်စပ်တည်းတွေးမိတဲ့ မြစ်ကူးတံတားအတွေ့အကြုံလေး ပြောပြချင်လာပါတယ်။ ဦးသိန်းစိန်ခေတ်လောက်ကဖြစ်သည်။ ကျွန်တော်တို့ရွာနားမှာ ဧရာဝတီမြစ်ကူးတံတားစီမံကိန်းကြီးတစ်ခုလုပ်နေဆဲအချိန်၊ ကျွန်တော်က စင်ကာပူက ခဏရွာအလည်ပြန်လို့ တံတားစီမံကိန်းကို ရောက်ဖူးအောင်သွားလည်ခဲ့ပါတယ်။ အဲဒီမှာ ကျောင်းနေဖက်ငယ်သူငယ်ချင်းက တံတားစီမံကိန်းမှာလုပ်နေတာနဲ့ ပြန်ဆုံလို့ သူကအကျယ်တဝင့် စိတ်ရှည်လက်ရှည်ရှင်းပြရှာပါတယ်။

မြစ်ကမ်းပါးတနေရာကနေကြည့်ကြရင်း၊ ဟေ့ကောင်ရ ဟိုတံတားတိုင်က ဘယ်ရွာက လယ်သူမဒေါ်ဘယ်သူလုပ်တာ၊ ဟောဟိုကတိုင်က ဘယ်ရွာက ဦးဘယ်သူလုပ်တာ၊ မင်းနှယ်ကွာ နိုင်ငံခြားနေမနေစမ်းပါနဲ့ ပြန်သာလာခဲ့စမ်းပါ။ ဒီမှာ လုပ်စရာဂွင်တွေ အများကြီးရှိတယ်၊ မင်း အင်ဂျင်နီယာ တွက်တတ်တာပဲ၊ ဘာမလုပ်ရဲစရာရှိသလဲကွ။ ဒီဘိုးပိုင်တတိုင်လောင်းရင် ဌာနဆီက သိန်း ၂၀၀ နဲ့တင်ဒါဆွဲရင်၊ တကယ်ကုန်တာက ၁၅၀ အေးဆေးပဲဟ။ သူက အာပေါင်အာရင်းသန်သန်နဲ့ ပြောလေ၊ ကျွန်တော်က စိတ်ထဲကြောက်လာလေလေပါပဲ။

သူက ဆက်ရှင်းပါတယ် တကယ်ဆိုတံတားပိုင်တလုံး ဥပမာ.. သိန်း ၅၀၀ လောက်ဘတ်ဂျက်ချပေးတာ၊ ရုံးချုပ်ကစဖြတ်၊ SE, EE, AE, SAE, JE စသဖြင့် အဆင့်ဆင့် ခွဲဝေခြမ်းလိုက်ကြတာ တကယ့်မြေပြင်မှာ လုပ်မယ့်ကန်ထရိုက်ဆီလည်းရောက်ကရော သိန်း ၂၀၀ ပဲ ကျန်တော့တယ်၊ ကန်ထရိုက်ကလည်း သူ့တွက်ကျန်အောင် ၁၅၀ နဲ့ ရအောင်လုပ်တယ်။ ခိုင်မခိုင် ကောင်းမကောင်း စဉ်းစားကြည့်ကြပေါ့။

ဒီတရုတ်သံပေါင်နည်းပညာနဲ့ ဝေစားမျှစားအောက်ခံအုတ်မြစ်နဲ့ ဧရာဝတီမြစ်ကြီးကို ဖြတ်ကူးကြရမှာ၊ နောက်ပိုင်းအခေါက်တွေ ပြန်ရောက်လို့ အဲတံတားပေါ်ကားဖြတ်မောင်းရင် သူငယ်ချင်းပြောတာတွေ နားထဲက ပြန်ကြားယောင်နေမိပြီး ကျောချမ်းတာကဖြင့်အမှန်ပါပဲ။ အော်… ကျွန်တော့်သူငယ်ချင်းက မြို့ပြအင်ဂျင်နီယာမဟုတ်ပါဘူး၊ ငယ်ငယ်က အမှတ်မမှားရင် မိသားစုစားဝတ်နေရေးအတွက် ၄ တန်းလောက်နဲ့ ကျောင်းထွက်ခဲ့ရသူပါ။ အလုပ်ဆက်စပ်လိုက်လုပ်ရင်း ဆောက်လုပ်ရေးတံတားစီမံကိန်းတွေမှာ ချိတ်မိပြီး ကြိုးစားသူ ဖင်ပေါ့သူမို့ နေ့စားဝန်ထမ်းဖြစ်နေတာပဲ ဖြစ်ပါတယ်။

မြန်မာအင်ဂျင်နီယာတွေဟာ တကယ်တော့ လူညံ့တွေ မဟုတ်ကြပါဘူး၊ အမှားကြာ အမှန်ဖြစ်လို့ လုပ်ပိုင်ခွင့်အာဏာကို ရပိုင်ခွင့်ဂွင်တွေပဲလို့ ကျင့်ဝတ်ပျက်ပြားကုန်ကြတာပဲ ဖြစ်ကြမှာပါ။ မိုးခါးရေသောက်ရင်း ကြာလာတော့ လူတစုဟာ လခစားဘဝနဲ့တင် ဘီလီယံနာတွေဖြစ်လာပြီး၊ တိုင်းပြည်ဟာ မြောင်းထဲထိုးဆင်းခဲ့ကြရတာပါ။

ဒီကြားထဲ ၃ သိန်းထိ လာဘ်စားလို့ရတယ်လို့ မူဝါဒချမှတ်လေတော့ ဇီးသီးဗန်းမှောက်ကုန်ကြပါတော့တယ်။ အခု ပြည်သူ့အစိုးရခေတ်မှာတော့ အစိုးရစီမံကိန်းတွေအားလုံးကို ပွင့်လင်းမြင်သာစွာဖြင့် တင်ဒါခေါ်၊ တိတိကျကျစစ်ဆေးနေကြလို့ ဒီဖက်ခေတ် လမ်းတံတားတွေဟာဖြင့် စစ်အစိုးရခေတ်ထက် အဆမတန်ပိုမိုကောင်းမွန်လာကြတာကို မျက်မြင်ဒိဌတွေ့နေကြရပါပြီ။

ရွေးကောက်ခံ အစိုးရတာဝန်ရှိသူတွေအနေနဲ့ ယောက်မမြင်းစီးမထွက်ကြဖို့ အခွန်ထမ်းပြည်သူတွေက အထူးတလည်မျှော်လင့်မိပါကြောင်း။

Zin Min Nyein

Be the first to comment

Leave a Reply

Your email address will not be published.


*