သင် ညတိုင်း မက်နေတဲ့ အိပ်မက်တွေဟာ ဘယ်လို အဓိပ္ပါယ်တွေကို ဖော်ဆောင်နေသလဲ ဆိုတာ

သင်ညစဉ်ညတိုင်း မက်နေတဲ့ အိပ်မက်တွေက တစ်ခါတစ်လေ သင့်ရဲ့ နေစဉ်ဘဝတွေအတွက် နိမိတ်တွေ ဖြစ်နေတတ်ပါတယ်။ ဥပမာ ညက သွားတွေ ကျိုးတာကို အိပ်မက်မက်တယ်ဆိုရင်၊ ဒါမှမဟုတ် ကောင်းကင်ပေါ်မှာ ပျံသန်းနေသလိုမျိုး မက်တယ်ဆိုရင် အဲ့ဒါဘာအဓိပ္ပါယ်လဲဆိုပြီး သူငယ်ချင်းကို မေးနေစရာ မလိုတော့အောင် ထူးဆန်းတဲ့ အိပ်မက်တွေ မက်တတ်သူတွေအတွက် ခုလို ဖော်ပြပေးလိုက်ပါတယ်။

၁။အမြင့်တစ်နေရာကနေ ပြုတ်ကျပြီး ကိုယ့်ကိုယ်ကို ဘယ်လိုမှ ထိန်းလို့မရသလို မက်တယ်ဆိုရင်

ဒီလိုအိပ်မက်မျိုးကို နှစ်မျိုး ယူလို့ရပါတယ်။ တစ်ခုက သင်ဟာခက်ခဲတဲ့အခြေအနေတစ်ခု ကြုံနေရတာကြောင့် စိတ်ပင်ပန်းနေတာမျိုးကို ဘယ်လိုဖြေရှင်းရမှန်းမသိတာပါ။ အဲ့ဒါမျိုးဆိုရင် လက်လွှတ်သင့်တာမျိုးကို စိတ်ရှင်းရှင်းနဲ့ ပြီးဆုံးအောင် လုပ်လိုက်ပါ။ နောက် ယုံကြည်သင့်တဲ့အရာကို ယုံကြည်ပေးလိုက်ပါ။ သံသယတွေ မများပါနဲ့။ နောက်တစ်ခုကတော့ သင်ဟာငြိမ်းချမ်းသွားပြီဆိုတဲ့ အယူပါ။ တစ်ခုခုကို သင်အောင်မြင်စွာ လုပ်နိုင်လိုက်တယ်ဆိုတာမျိုးကြောင့် သင့်စိတ်ငြိမ်းချမ်းသွားပြီလို့ ယူလို့ရပါတယ်။

၂။လူတွေကြားထဲ သင်ဟာ အဝတ်ဗလာနဲ့ ဖြစ်နေသလိုမျိုး မက်တယ်ဆိုရင်

ဒီလိုအိပ်မက်ပြီး မကြာခင်မှာ သင်ဟာ အလုပ်မှာ ရာထူးတိုးတာမျိုး ဖြစ်နိုင်သလို ရှက်စရာကိစ္စရပ်တစ်ခုခု ကြုံရတာမျိုးလည်း ရှိနိုင်ပါတယ်။ ဒါ့အပြင် သင်ဖုံးကွယ်ထားတဲ့အရာတစ်ခုခု ပေါ်သွားတာ ဒါမှမဟုတ် အဲ့ဒီကိစ္စကို အမေးခံရတာမျိုးတွေ ကြုံတွေ့နိုင်ပါတယ်။

၃။စာမေးပွဲအခန်းထဲ ဘာမှမပြင်ဆင်ထားပဲ ဖြေဖို့ရောက်နေသလိုမျိုး၊ ဖြေဖို့သွားနေချိန်အတွင်း မရောက်နိုင်ပဲ နောက်ကျနေတာမျိုး မက်တယ်ဆိုရင်

ဒီလိုအိပ်မက်မျိုး မက်တယ်ဆိုရင် သင့်မှာ စိုးရိမ်ပူပန်စရာ အခြေအနေတစ်ခုခု ရှိနေတာကြောင့်ပါ။ နောက်တစ်ခုကကျောင်းမှာ အလုပ်မှာ စိတ်ဖိစီးမှုကြုံနေရတာဖြစ်ပြီး ကိုယ်လုပ်လိုက်တဲ့အရာကို တခြားသူတွေ ဝေဖန်မှာ စိုးရိမ်နေတာမျိုးကြောင့်ပါ။

၄။သရဲ၊ တစ္ဆေ၊ အကောင်တစ်ကောင်ကောင်၊ လူတစ်ယောက်ယောက်က သင့်နောက်လိုက်နေသလိုမျိုး မက်တယ်ဆိုရင်

ဒီလိုအိပ်မက်မျိုး မက်တဲ့အခါ သင့်စိတ်မှာ ဒါမှမဟုတ် အပြင်မှာ တစ်စုံတစ်ယောက်၊ တစ်စုံတစ်ခုက ခြိမ်းခြောက်တာ ခံနေရတာကြောင့်သာ ဖြစ်ပါတယ်။ အဲ့ဒီအခြေအနေကနေ လွတ်မြောက်ဖို့အတွက်၊ ဒီအခြေအနေကို အဆုံးသတ်ဖို့အတွက် သင့်မသိစိတ်ရော သိစိတ်ကပါ အပြင်းအထန် ကြိုးစားချင်နေတာမျိုးပါ။

၅။ကောင်းကင်မှာ ပျံသန်းနေသလိုမျိုး မက်တယ်ဆိုရင်

ဒီလို အိပ်မက်မျိုးကတော့ အကောင်းဘက်ကိုသာ သွားတဲ့အိပ်မက်ပါ။ သင်ဟာ သင့်ကိုယ်သင် ထိန်းချုပ်နိုင်နေပြီဖြစ်သလို တခြားသင်ထိန်းချုပ်ရမယ့်အရာတွေကိုလည်း သင်အဆင်ပြေပြေ ကိုင်တွယ်နေနိုင်တာမျိုးပါ။ သင့်စိတ်အခြေအနေက သင့်ကို တည်ငြိမ်ခိုင်မာစွာ ဆက်သွားဖို့ အခွင့်အရေးပေးနေပါပြီ။ သင်ဟာ အခြေအနေပေါင်းများစွာကို အဆင်ပြေပြေ ဖြတ်သန်းနိုင်ပြီဆိုတာပါပဲ။

၆။သွားတွေကျိုးတာ၊ ကျိုးပဲ့ပြီး ထွက်ကျတာမျိုး မက်တယ်ဆိုရင်

လူတွေက ဒီလိုအိပ်မက်မျိုးမက်ရင် မကောင်းဘူးဆိုပြီး စိုးရိမ်စိတ်တွေ ဖြစ်ပေါ်တတ်ပါတယ်။ ဒီလိုမျိုးမက်ပြီဆိုရင် သင့်စိတ်ထဲ ကြောက်စိတ်တစ်ခုခုရှိနေလို့ပါ။ ငါအသက်ကြီးလာပြီ၊ ငါဆွဲဆောင်မှုမရှိတော့ဘူးဆိုတဲ့ စိတ်တွေလည်း သင့်မှာ ရှိနေပါလိမ့်မယ်။ ဒါ့အပြင်သွားတွေဟာ ပါဝါ၊ ဉာဏ်ပညာ၊ ဆက်သွယ်ချိတ်ဆက်မှု စတာတွေနဲ့ ပတ်သက်နေတာကြောင့် သင်ဟာ ကိုယ့်ကိုယ်ကို ယုံကြည်မှု နည်းလာတာ၊ သင့်ခံစားချက်အစိတ်အမှန်တွေကို မဖော်ထုတ်ရဲတော့သလို ဖြစ်နေတာမျိုးတွေ ခံစားနေရလို့ပါ။ ဒါ့အပြင် သူဟာ အပြောင်းအလဲတစ်ခုခုကို လုပ်ဆောင်ရတော့မှာမို့ စိတ်မတည်ငြိမ်တာကိုလည်း ပြနေပါတယ်။ ဒါ့ကြောင့် သင့်ဘဝရဲ့ ဘယ်အခြေအနေမှာ ပူပန်စရာရှိနေသလဲဆိုတာတွေးပြီး ဒါကို ကောင်းကောင်လေး ဖြေရှင်းလိုက်ပါ။ သင်လုပ်နိုင်ပါတယ်။

၇။မိသားစုဝင်၊ သူငယ်ချင်း၊ ရင်းနှီးတဲ့သူတစ်ယောက်ယောက် ဆုံးပါးသွားတယ်လို့ မက်တယ်ဆိုရင်

ဒီလိုအိပ်မက်မျိုး မက်တယ်ဆိုရင် ဒါဟာ စိတ်ပျက်ဝမ်းနည်းစရာ မဟုတ်ပါဘူး။ သင့်စိတ်အခြေအနေ ပြောင်းလဲရတော့မယ်လို့ ယူဆရမယ့် အိပ်မက်ပါ။ နောက်တစ်ခုက နောက်ထပ်ရည်မှန်းချက်အသစ်၊ ဘဝသစ်ကို စတင်တော့မယ့်အနေအထားလို့လည်း ယူလို့ရပါတယ်။

၈။ကြည်လင်နေတဲ့ရေ၊ နောက်ကျိနေတဲ့ ရေတွေ အိပ်မက်မက်တယ်ဆိုရင်

သင့်စိတ်အနေအထား ကြည်လင်အေးချမ်းနေမယ်ဆိုရင် သင်ဟာ အိပ်မက်ထဲမှာ ကြည်လင်တဲ့ရေတွေကို မက်ပါလိမ့်မယ်။ သင့်စိတ်အခြေအနေဟာ ရှုပ်ထွေးပြီး ဖိစီးမှုတွေခံစားနေရပြီဆိုရင် သင်ဟာ နောက်ကျိနေတဲ့ ရေတွေကိုသာ မက်ပါလိမ့်မယ်။

Be the first to comment

Leave a Reply

Your email address will not be published.


*